(កំពង់ស្ពឺ) ៖ ដោយបានការដឹកនាំបញ្ជាដ៏ខ្ពង់ខ្ពស់ពីលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ និងបានការចង្អុលណែនាំពីជំនាញព្រហ្មទណ្ឌ លោកវរសេនីយ៍ឯក ចន សុភីត អធិការនគរបាលស្រុកបសេដ្ឋ បានដឹកនាំកម្លាំងផ្នែកព្រហ្មទណ្ឌ ចុះពិនិត្យនិងស្រាវជ្រាវលើករណីជនសង្ស័យមួយក្រុម ជិះម៉ូតូ ០២គ្រឿង ម៉ាកហុងដា C125 ពណ៌ខ្មៅ ដែលបានកំហែងយកដោយហិង្សាលើជនរងគ្រោះព្រោះតែទូរស័ព្ទដៃ ០១គ្រឿង ម៉ាក VIVO Y33S ពណ៌ខ្មៅ ពីជនរងគ្រោះឈ្មោះ ហ៊ុន សារុន ភេទប្រុស អាយុ ៧១ឆ្នាំ នៅចំណុចតូបលក់អីវ៉ាន់ ស្ថិតក្នុងភូមិរការធំ ឃុំកាត់ភ្លុក ស្រុកបសេដ្ឋ ខេត្តកំពង់ស្ពឺ ដោយបក្ខពួកជនសង្ស័យបានធ្វើការប្រតាយប្រតប់វាយទៅលើជនរងគ្រោះ បណ្តាលឱ្យរងរបួសត្រង់ចំភ្នែកខាងឆ្វេងស្មារខាងឆ្វេង និងជើងខាងឆ្វេងដាច់រលាត់រងរបួសធ្វើឱ្យឈឺចុកចាប់ពេញខ្លួនប្រាណ កាលថ្ងៃទី០៨ ខែកញ្ញា ឆ្នាំ២០២៥ ដោយជនរងគ្រោះនៅតែឯង ក្រោយធ្វើសកម្មភាពបានសម្រេច ក្រុមជនសង្ស័យបានជិះម៉ូតូគេចខ្លួន។
ដោយមានព័ត៌មាន និងតម្រុយជាក់លាក់អំពីទម្រង់នៃសកម្មភាពខាងលើ កម្លាំងជំនាញបានឈានទៅធ្វើការកំណត់មុខសញ្ញាបក្ខពួក និងឃាត់ខ្លួនក្រុមជនសង្ស័យបាន ០៥នាក់ គេចខ្លួន ០១នាក់ ៖ ១-ឈ្មោះ យ៉ុង ថាវី ភេទប្រុស អាយុ ២៦ឆ្នាំ ២-ឈ្មោះម៉ៅ ថេត ភេទប្រុស អាយុ ១៧ឆ្នាំ ៣-ឈ្មោះ ហៀង ឆៃ ភេទប្រុស អាយុ ១៧ឆ្នាំ ៤-ឈ្មោះ គួន សីហា ភេទប្រុស អាយុ ១៥ឆ្នាំ ៥-ឈ្មោះ នួន ណារិន ភេទប្រុស អាយុ ១៦ឆ្នាំ ៦-ឈ្មោះ ស.ដ.វ. ប្រុស (គេចខ្លួន)។
ក្រោយប្រតិបត្ដិការស្រាវជ្រាវបង្រ្កាបមុខសញ្ញាសង្ស័យទាំង ០៥នាក់ សមត្ថកិច្ចរកឃើញថា ចំណោមមុខសញ្ញាទាំង ០៦នាក់នេះ គឺធ្លាប់បានប្រព្រឹត្ដករណីលួចទូរស័ព្ទដៃ ម៉ាក OPPO ពណ៌ផ្ទៃមេឃ កាលពីថ្ងៃទី១០ ខែកញ្ញា ឆ្នាំ២០២៥ នៅចំណុចផ្ទះជនរងគ្រោះឈ្មោះ សៀង រ៉ា ភេទប្រុស អាយុ ៤២ឆ្នាំ ស្ថិតក្នុងភូមិចំបក់ ឃុំកាត់ភ្លុក ស្រុកបសេដ្ឋ ខេត្តកំពង់ស្ពឺ ដោយមិនស្គាល់អត្តសញ្ញាណជនសង្ស័យ។
សមត្ថកិច្ចដកហូតបានវត្ថុតាងរួមមាន ម៉ូតូសេ ១២៥ ចំនួន 0១គ្រឿង និងទូរស័ព្ទដៃ 0២គ្រឿង ជារបស់ជនរងគ្រោះទាំង ០២គ្រឿង ផ្អែកតាមភស្ដុតាង និងចម្លើយជនសង្ស័យ សមត្ថកិច្ចបានបញ្ជូនខ្លួនមុខសញ្ញាទាំង ០៥នាក់ និងវត្ថុតាងមកកាន់អធិការដ្ឋាននគរបាលស្រុកបសេដ្ឋ ដើម្បីបំពេញនីតិវិធី កសាងសំណុំរឿងបញ្ជូនទៅការិយាល័យព្រហ្មទណ្ឌខេត្ដ ចំណាត់ការតាមច្បាប់៕
