(កំពង់ស្ពឺ) ៖ ដោយបានការដឹកនាំបញ្ជាដ៏ខ្ពង់ខ្ពស់ពី លោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ កម្លាំងនគរបាលព្រហ្មទណ្ឌ នៃអធិការដ្ឋាននគរបាលក្រុងច្បារមន បានទទួលបណ្ដឹងករណីហិង្សាដោយចេតនា កាលពីថ្ងៃទី១៣ ខែកញ្ញា ឆ្នាំ២០២៥ នៅចំណុចផ្លូវលំ ក្នុងភូមិផ្សារចាស់ សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ។
យោងតាមបណ្ដឹងរបស់ឈ្មោះ ថន គីមរ៉ុង ហៅ រ័ត្ន ភេទស្រី អាយុ ១៧ឆ្នាំ ស្នាក់នៅបន្ទប់ជួលភូមិផ្សារចាស់ សង្កាត់ស្វាយក្រវ៉ាន់ ក្រុងច្បារមន បានប្ដឹងចោទប្រកាន់ទៅលើបក្ខពួកជនបង្កហឹង្សា ០៤នាក់ ដែលបានធ្វើសកម្មភាពព្រួតគ្នាវាយបោចសក់ និងថតសកម្មភាពបង្កហិង្សាបង្ហោះចែកចាយតាមបណ្ដាញសង្គម Tik Tok ធ្វើឱ្យមានការប៉ះពាល់ដល់សិទ្ធិ និងកេរ្ដិ៍ខ្មាសបុគ្គល និងបង្កអាណាធិបតេយ្យដល់សង្គម ដោយការបានដឹកនាំពី លោកវរសេនីយ៍ទោ យ័ន្ដ សង្ហារ អធិការនគរបាលក្រុងច្បារមន កម្លាំងជំនាញបានឃាត់នារីវ័យក្មេង និងបក្ខពួក រួមមាន៖
១.ឈ្មោះ ឈឿន គិវី ភេទស្រី អាយុ ១៧ឆ្នាំ (អ្នកយកស្បែកជើងវាយ)
២.ឈ្មោះហឿន ស្រីនិច្ច ភេទស្រី អាយុ ១៧ឆ្នាំ (អ្នកឈរឡាយវីដេអូ)
៣.ឈ្មោះ ភ័ក្រ មិនា ភេទស្រី អាយុ ១៦ឆ្នាំ (អ្នកចូលវាយផ្ដួលគូរប្រកួត)
៤.ឈ្មោះម៉ុន ស្រីលីន ភេទស្រី អាយុ ១៨ឆ្នាំ (អ្នកកាន់កាមេរ៉ាថតឡាយវីដេអូ) អ្នកទាំង ០៤នាក់ ស្នាក់នៅបន្ទប់ជួលជាមួយគ្នា ស្ថិតក្នុងភូមិផ្សារចាស់ សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ។
តាមរយៈវីដេអូ និងចម្លើយរបស់អ្នកទាំង ០៤ បានទទួលស្គាល់ថា ពួកគេពិតជាបានរួមគ្នាធ្វើសកម្មភាពព្រួតវាយទៅលើជនរងគ្រោះឈ្មោះ ថន គីមរ៉ុង បណ្ដាលឱ្យរងរបួសថ្លោះក បែកបបេរមាត់ រហែក និងពកក្បាលប្រាកដមែន មូលហេតុព្រោះតែឈ្មោះ ថន គីមរ៉ុង ជំពាក់លុយមិនសង រួចនិយាយសម្ដីឌឺដង ផ្លែផ្កាឱ្យមកក្រុមរបស់ខ្លួនទៀត។
បច្ចុប្បន្ន សមត្ថកិច្ចនៃអធិការដ្ឋាននគរបាលក្រុងច្បារមន បានកសាងសំណុំរឿងបញ្ជូនទៅការិយាល័យនគរបាលព្រហ្មទណ្ឌ ដើម្បីចាត់ការតាមនីតិវិធីច្បាប់៕
